Tava e koranit me qepë është një gatim tradicional i zonës bregliqenore të Pogradecit. Ai është një gatim i veçantë i cili shoqëron familjet pogradecare në ngjarjet më të rëndësishme të jetës së tyre. Për shkak të kushtëzimit prej faktit se korani gjendet vetëm në liqenin e Pogradecit, ky gatim është më i përhapur në zonën bregliqenore. Ai konsiston në gatimin e peshkut koran në tavë balte shoqëruar me qepë dhe ujë liqeni (siç është mënyra më tradicionale e gatimit).
Peshk , qepë dhe verë … për amvisat dhe pjestarët e tjerë të familjes ishte ndër drekat më të shijshme dhe katër stinore. Qepa duke e vendosur në vargje qëndron e freskët për shumë muaj dhe mund ta përdorësh në cdo stinë.
Po si gatuhej kjo tavë?
Për 4 persona
Produktet:
2 kg peshk – Koran – belushke – Krap
2 kg qepë
8 lugë gjelle yndyrë
Piper i kuq
Piper i zi
Kripë
2-3 gjethe define
Mënyra e gatimit:
Mbasi pastrojme peshqit dhe i ndajmë në racione nëse janë të mëdhënj i kripim dhe hedhim pak piper të zi.
Pastrojme qepët dhe i grijmë në mënyre rrethore shumë hollë , më pas i hedhim në tigan dhe i kaurdisim me yndyrë deri sa qepa të zverdhet. Hedhim shume pak uje , kripë sipas dëshirës , piper të kuq, fletët e dafinës dhe e vendosim në zjarr të ngadaltë deri sa qepa të zjejë plotësisht. Qepën e zjerë e hedhim në tavë dhe mbi të vendosi peshqit e marinuar më parë duke i lyer me pak yndyrë sipër dhe shume pak piper të kuq nëse dëshironi.
Tava vendoset në furrën e nxehur më parë në 250 grade duke lënë deri sa peshku të jetë pjekur plotësisht dhe shoqërohet kryesisht me verë të bardhë por edhe të kuqe sipas dëshirës.
